واشنگٹن(نیشنل ٹائمز) امریکی صدر ڈونلڈ ٹرمپ نے جنگ بندی کے خاتمے اور ایران پر دوبارہ حملوں کا اشارہ دے دیا۔

امریکی صدر ڈونلڈ ٹرمپ نے اوول آفس میں میڈیا سے گفتگو کرتے ہوئے ممکنہ طور پر جنگ بندی کے خاتمے سے متعلق سوال پر جواب دیا کہ مجھے نہیں لگتا کہ اس کی ضرورت ہے لیکن شاید پڑ بھی سکتی ہے۔

انہوں نے کہا کہ ایران پر لگائی گئی پابندیاں کامیاب ہیں، ایران تیل فروخت نہیں کرسکتا، وہ معاہدہ کرنا چاہتا ہے، ایران کے خلاف فوجی آپریشن پہلے شروع کرنا چاہئے تھا، ایران جوہری ہتھیار نہیں رکھ سکتا، ایران کی معیشت تباہ ہوتی جارہی ہے، ایران کی 90 فیصد میزائل کی فیکٹریاں تباہ کردیں۔

صدر ٹرمپ بولے ایرانی قیادت کے حوالے سے غیر یقینی صورتحال ایک بڑا مسئلہ ہے کیونکہ کسی کو معلوم نہیں کہ وہاں اصل لیڈر کون ہے۔

انہوں نے صحافیوں سے گفتگو کے دوران یہ بھی کہا کہ ایران کو فٹبال ورلڈکپ میں شرکت کی اجازت دینی چاہیے۔

ڈونلڈ ٹرمپ نے ایک بار پھر پاک بھارت جنگ کا تذکرہ کرتے ہوئے بولے میں نے پاک بھارت جنگ سمیت 8 جنگیں رکوائیں، پاکستان اور بھارت کی جنگ میں 11 طیارے گرائے گئے، وزیراعظم پاکستان شہبازشریف نے کہا آپ نے 5 کروڑ انسان بچائے۔

امریکی صدر نے کہا ایران جنگ ختم ہوتے ہی تیل وگیس کی قیمتیں فوراً کم ہوجائیں گی، انہوں نے آبنائے ہرمز سے متعلق بات کرتے ہوئے کہا کہ ہم آبنائے ہرمز استعمال نہیں کرتے، ہمارے پاس بہت تیل ہے۔