اسلام آباد (نیشنل ٹائمز)معروف پاکستانی اداکارہ مریم نفیس نے بھی تحریکِ عدم اعتماد پر ووٹنگ کے وقت حکومتی بینچز پر موجود علی محمد خان کی تعریف کردی۔مریم نفیس نے مائیکرو بلاگنگ ویب سائٹ ٹوئٹر پر پارلیمنٹ میں تحریکِ عدم اعتماد کی کامیابی کے بعد حکومتی بینچز پر موجود پاکستان تحریکِ انصاف کے رکنِ قومی اسمبلی علی محمد خان کی کھڑے ہوکر عمران خان کا ساتھ دینے اور پر جوش تقریر کرنے پر تعریف کی ہے۔اُنہوں نے اپنے ٹوئٹ میں لکھا کہ’وہ علی محمد خان کی بہت عزت کرتی ہیں‘۔اُنہوں نے علی محمد خان کی تقریر کی تعریف کرتے ہوئے لکھا کہ’ کیا زبردست تقریر تھی‘۔واضح رہے کہ تحریک عدم اعتماد کی کامیابی کے بعد علی محمد خان نے اپنا مؤقف خطاب کے دوران پیش کیا۔جنوبی وزیرستان سے تعلق رکھنے والے رکن پارلیمنٹ علی محمد خان نے جب اپنا خطاب شروع کیا تو قائد اعظم محمد علی جناح کے ایک قول کا حوالہ دیا اور کہا کہ مجھے فخر ہے، خوشی ہے کہ میں عمران خان کے ساتھ ہوں، جس نے حکومت قربان کردی لیکن غلامی قبول نہیں کی۔ان کا کہنا تھا کہ آج آپ کے چہروں پر خوشی ہے، اللّٰہ آپ کو ہمیشہ خوش رکھے۔ آج میری پارلیمانی امور کے وزیر کی ڈیوٹی تمام ہوئی۔