کراچی (نیشنل ٹائمز) خوبرو اداکارہ مہر بانو نے انکشاف کیا ہے کہ شوٹنگ کے دوران سیٹ پر جب وہ ہراسانی کا شکار ہوئی تھیں تو انہیں معروف اداکارہ و سپر ماڈل صباقمر نے بچایا تھا اور ان کی مدد کی تھی۔ ایک انٹرویو میں مہر بانو نے شوٹنگ کے دوران ہراسانی کا شکار ہونے سے متعلق انکشاف کیا ہے۔ مہر بانو کا کہنا تھا کہ وہ شوٹنگ کے دوران ایک سیٹ پر موجود تھیں، انہیں ایک کریو ممبر کی جانب سے ہراساں کیا گیا تھا، وہ یہ سب دیکھ کر حیران رہ گئی تھیں اور انہیں کچھ سمجھ بھی نہیں آ رہا تھا کہ یہ ہو کیا رہا ہے۔ مہر بانو نے مزید بتایا کہ انہوں نے یہ بات سیٹ پر موجود صبا قمر کے ساتھ شیئر کی، صبا قمر نے ان کا ساتھ دیا اور ان کے لیے ایک مضبوط آواز اٹھائی، صبا قمر نے ہراساں کرنے والے ممبر کو شوٹنگ سے ہی نکلوا دیا تھا۔مہر بانو کا بتانا تھا کہ اس واقعے کے بعد انہیں احساس ہوا کہ آپ کسی بھی وقت کسی کے بھی ہاتھوں ہراسانی کا شکار بن سکتے ہیں، اسی لیے خود کو مضبوط بنانا چاہیے اور اپنی آنکھیں کھلی رکھنی چاہئیں۔ان کا کہنا تھا کہ اس واقعے کے بعد انہیں احساس ہوا کہ ہر عورت کو خود کو اتنا مضبوط بنانا چاہیے کہ وہ دوسری عورت کا ساتھ دے سکے اور اس کے لیے آواز بلند کر سکے۔