اسلام آباد(نیشنل ٹائمز)وفاقی وزیر قانون و انصاف فروغ نسیم نے کہا ہے کہ ریکو ڈک کیس میں برطانوی عدالت کا فیصلہ پاکستان کی بڑی کامیابی ہے۔وزیر اعظم عمران خان کی قیادت میں آخری وقت تک پاکستان کا دفاع کریں گے ۔ان خیالات کا اظہار انہوں نے بدھ کو صحافیوں سے گفتگو کرتے ہوئے کیا۔فروغ نسیم نے کہا کہ برطانوی عدالت کے فیصلے کے بعد پی آئی اے کے منجمد تمام اثاثے ریلیز ہوگئے ہیں۔وفاقی وزیر قانون فروغ نسیم نے کہا کہ پوری قوم، وزیر اعظم سمیت سب کو ریکوڈک کیس میں کامیابی پر مبارکباد پیش کرتا ہوں، پاکستان کو بھرپور کامیابی ملی۔انہوں نے کہا کہ جب حکومت آئی تو حکومت کو بہت سے مسائل کا سامنا تھا، ساڑھے 6 بلین ڈالر جرمانے کا سامنا تھا، لڑکھڑاتی معیشت سمیت بہت سے بین الاقوامی کیسز کا بھی سامنا تھا۔فروغ نسیم نے کہا کہ کامیابی کے لیے سب نے بہت محنت کی۔انہوں نے کہا کہ وزیراعظم کی ہدایات پر میری سربراہی میں خصوصی کمیٹی بنائی گئی ۔وزیر اعظم عمران خان نے اس کیس میں ذاتی دلچسپی لی ہے ، امریکی اور برطانوی وکلا سے مشاورت کی، موجودہ اور سابق اٹارنی جنرل کا کردار بھی اہم تھا، احمد عرفان کا کردار بہت اہم تھا، احمد عرفان کے لیے ستارہ امتیاز کی تجویز دی ہے ، ائیر مارشل ارشد ملک نے بھی بھرپور کردار ادا کیا۔وفاقی وزیر قانون نے کہا کہ ٹیتھیان کمپنی کو بھی بتایا گیا کہ یہ عمران خان کی حکومت ہے، موجودہ حکومت میں نہ کوئی پیسہ کھائے گا، نہ کھانے دے گا، پاکستان دعاؤں کا نتیجہ ہے، پاکستان قائم رہنے کے لیے بنا اور ترقی کرے گا۔انہوں نے کہا کہ بی وی آئی عدالت کے فیصلے کے نتیجے میں سب اثاثے ہمیں مل گئے، ابھی بھی بہت سے چیلنجز کا سامنا ہے۔انہوں نے کہا کہ ہر کیس میں بھرپور طریقے سے ملک کا دفاع کیا جا رہا ہے۔انہوں نے کہا کہ وزارت قانون جو کام کرتی رہی وہ ایک دن میں نہیں ہوااس میں بہت محنت کی گئی ہے ۔ایک سوال کے جواب میں وفاقی وزیر نے کہا کہ عدالتی فیصلے کے نتیجے میں سب اثاثے ہمیں مل گئے ہیں ہم انہیں استعمال اور فروخت بھی کر سکتے ہیں ۔وفاقی وزیر فروغ نسیم نے کہا کہ پاکستان کو اب بھی بہت سے چیلنجز کا سامنا ہے۔