اسلام آباد(نیشنل ٹائمز)پاکستان مسلم لیگ(ق)شعبہ خواتین کی مرکزی صدر ورکن قومی اسمبلی مسزفرخ خان ،جنرل سیکرٹری فوز یہ ناز، انفارمیشن سیکرٹری لبنی قریشی قریشی سمیت دیگر خواتین عہدیداران نے فلسطینی شہری آبادی اور بے گناہ فلسطینی عوام پر اسرائیلی جارحیت کی پرزور مذمت کی اور کہا کہ اسرائیل کانہتے فلسطینی عوام پر طاقت کا بے رحمانہ استعمال انسانی حقوق کی کھلی خلاف ورزی ہے، اسرائیل جنگ بندی پر آمادہ تو ہوگیاہے مگر یہ جنگ بندی مستقل حل نہیں،آزاد ریاست کا وجود ہی مسئلہ فلسطین کا واحدحل ہے،جب تک مسئلہ فلسطین اور کشمیر حل نہیں ہوگا دنیا میں امن ایک خواب رہے گا۔اپنے ایک بیان میں مسز فر خ خان نے پارٹی قائدچودھری شجاعت حسین کا بیان خوش آئند قرار دیتے ہوئے کہاکہ ہماری پارٹی کے وزرائ، ارکان اسمبلی اور سینیٹر اپنی اپنی تنخواہ ریلیف فنڈ میں جمع کروائیں گے جبکہ سپیکر پنجاب اسمبلی چودھری پرویزالٰہی سمیت تمام ارکان پنجاب اسمبلی بھی اپنی تنخواہ فلسطینی بھائیوں کی امداد کیلئے ریلیف فنڈ میں جمع کروائیں گے ۔انہوں نے تمام پارٹی رہنمائوں اور کارکنوں سے اپیل کی کہ وہ بھی بڑھ چڑھ کر اپنے فلسطینی بھائیوں کی امداد کریں۔