اسلام آباد(نیشنل ٹائمز)وزیر خارجہ مخدوم شاہ محمود قریشی کی جنرل اسمبلی کے ہنگامی اجلاس کے موقع پر، اقوام متحدہ ہیڈکوارٹر نیویارک میں کویت کے وزیر خارجہ جناب ڈاکٹر احمد نصر ال محمد الصباح کے ساتھ ملاقات ہوئی۔دونوں وزرائے خارجہ کے مابین فلسطین کی بگڑتی ہوئی صورتحال پر تبادلہ خیال ہوا۔وزیر خارجہ نے فلسطین کے مقبوضہ علاقوں میں کشیدگی میں کمی کیلئے برادر ملک کویت کی موثر کاوشوں کو سراہا۔اسرائیلی فوج کی جانب سے نہتے فلسطینیوں پر بہیمانہ مظالم کے تسلسل اور طاقت کے بدریغ استعمال پر پوری مسلم امہ، حالت اضطراب میں ہے۔پاکستان، عبادت میں مشغول فلسطینیوں پر منظم حملوں، مسجد اقصٰی کی بے حرمتی،اسرائیل کی غیر قانونی آبادکاریوں، مظلوم فلسطینیوں کی جبراً بے دخلییوں اور ان کے گھروں کے جبری انہدام کی شدید الفاظ میں مذمت کرتا ہے۔پاکستان، نہتے اور مظلوم فلسطینیوں کی اخلاقی اور سفارتی معاونت اور ان کے حق خود ارادیت کی جدوجہد کی مکمل حمایت جاری رکھے گا۔ آج اقوام متحدہ جنرل اسمبلی کے ہنگامی اجلاس کا انعقاد، او آئی سی کی جانب سے عالمی برادری کیلئے ایک واضح پیغام ہے ۔عالمی برادری پر ذمہ داری عائد ہوتی ہے کہ وہ فلسطینیوں پر اسرائیلی جارحیت کے خاتمے اور مسئلہ فلسطین کے منصفانہ حل کیلئے فوری موثر اقدام اٹھائے۔دونوں وزرائے خارجہ کا فلسطین کی صورتحال کو اعتدال پر لانے اور فلسطینی بھائیوں کی معاونت کیلئے باہمی اور سفارتی روابط جاری رکھنے پر اتفاق کیا گیا۔