اسلام آباد(نیشنل ٹائمز)رنگ روڈ میگا سیکنڈل پر پیپلزپارٹی نے وزیراعظم سمیت اسکینڈل میں ملوث وزراء سے مستعفی ہونے کا مطالبہ کر دیا ہے۔ وزیراعظم عمران خان سمیت وزیر اعلی پنجاب عثمان بزدار غلام سرور، شہزاد اکبر فوری طور پر عہدوں سے مستعفی ہوں۔ پاکستان پیپلز پارٹی کے سیکرٹری جنرل سید نیر حسین بخاری نے رد عمل میں کہا ہے کہ بدعنوانی خاتمے کے دعویدار عمران خان” بڑھتی بدعنوانی ” کے سہولت کار نکلے ہیں۔ عوام الناس سوال میں حق بجانب ہیں کہ قومی خزانے پر ڈاکہ ڈالنے والوں سے حساب لینے کے وقت”کسی کو نہیں چھوڑوں گا ۔” اعلان کرنے والا حکمران کہاں سو گیا ہے۔ نیر بخاری نے کہا کہ موجودہ حکومت مکمل طور پر میگا اسکینڈلز کی زد میں آ چکی ہے۔ عمران خان کے “خاندانی حکومتی پیارے ” بدعنوانی کے ہر بڑے میگا سیکنڈل اور قوم کے جیبوں پر ڈاکے ڈالنے سے داغدار ہے ۔نیر بخاری نے مزید کہا کہ رنگ روڈ اسکینڈل موجودہ حکومت کے خلاف کئی چارج شیٹوں میں ایک اور چارج شیٹ کا اضافہ ہے ۔انہوں نے کہا کہ زلفی بخاری کے مستعفی ہونے سے اپوزیشن کے تحفظات اور خدشات درست ثابت ہوئے۔صرف وزراء کو قربانی کا بکرا بنانا عوام کی آنکھوں میں دھول جھونکنے کے مترادف ہے۔نیر بخاری نے مزید کہا کہ قومی عوامی مسائل و معاملات سے بے خبر اور بے حسی وزیراعظم پارلیمنٹ کے لئے لاپتہ ہیں۔ انہوں نے کہا کہ طے شدہ منصوبے کے تحت پارلیمنٹ کو مفلوج بنا کر فوج کے ساتھ ہونے کے بیانات دیکر اداروں کو متنازعہ بنانے کی کوشش کی جا رہی ہے۔ نیر بخاری نے کہا کہ نااہل حکومت بساکھیوں پر کھڑی ہے جو جلد اپنے ہی بوجھ سے گرنے والی ہے۔