اسلام آباد(نیشنل ٹائمز)وزیر خارجہ مخدوم شاہ محمود قریشی نے کہا کہ عالمی برادری اور انسانی حقوق کی عالمی تنظیمیں مقبوضہ کشمیر میں “ہیومن کاریڈور” کے قیام کیلئے بھارت پر دباؤ ڈالیں۔یہ بات انہوں نے بدھ کو پارلیمانی کمیٹی برائے کشمیر کے اجلاس کے بعد پارلیمنٹ ہاؤس میں میڈیا سے گفتگو کرتے ہوئے کہی۔وزیر خارجہ نے کہا کہ اس اجلاس میں تمام جماعتوں نے شرکت کی ،ہم نے اجتماعی طور پر ایک مرتبہ پھر بھارت کو انسانی ہمدردی کے تحت مدد کی پیشکش کی اور ہم آج بھی بھارت کی جانب سے جواب کے منتظر ہیں ۔انہوں نے کہا کہ ہمیں مقبوضہ کشمیر کی صورتحال پر بے حد تشویش ہے ۔مظلوم کشمیری دوہرے لاک ڈاؤن کا سامنا کر رہے ہیں۔انہیں ادویات، ویکسین اور ہسپتالوں تک رسائی میں مشکلات کا سامنا ہے۔وزیر خارجہ نے کہا کہ کشمیر کمیٹی کے اجلاس میں اس ساری صورتحال پر بحث ہوئی اور تمام جماعتوں نے متفقہ طور پر قرارداد منظور کی جس کےمطابق ہم عالمی برادری اور انسانی حقوق کے حوالے سے کام کرنے والی عالمی تنظیموں سے یہ مطالبہ کرتے ہیں کہ وہ وبائی صورتحال کو پیش نظر رکھتے ہوئے، مقبوضہ کشمیر میں “ہیومن کاریڈور” کے قیام کیلئے بھارت پر دباؤ ڈالیں ،تاکہ نہتے کشمیریوں کو ادویات اور طبی سہولیات تک رسائی فراہم کی جا سکے ۔وزیر خارجہ نے کہا کہ میں تمام جماعتوں کا شکریہ ادا کرنا چاہوں گا کہ انہوں نے اس اہم اجلاس میں شرکت کی اور متفقہ طور پر اس قرارداد کو منظور کیا۔وزیر اعظم عمران خان نے ترقی پذیر ممالک کو کورونا وبا کے اقتصادی مضمرات سے بچانے کیلئے عالمی برادری کو “ڈیٹ ریلیف” کی تجویز دی،اس تجویز کا مثبت ردعمل سامنے آیا۔جی 20 کا اجلاس ہوا بہت سے ممالک نے جی 20 کے فورم پر اور بعض ممالک نے دو طرفہ حوالے سے بھی “ڈیٹ ریلیف” فراہمی کا تحرک کیا،بہت سے ممالک کے ساتھ، ساتھ پاکستان بھی اس اقدام سے مستفید ہوا ،ہم اس اقدام کا خیر مقدم کرتے ہیں۔وزیر خارجہ نے کہا کہ کورونا وبا کی تیسری لہر بہت شدت اختیار کر رہی ہے ،ہم سمجھتے ہیں کہ اس وبا کے مضمرات سے بچاؤ کیلئے مزید مراعات کی گنجائش موجود ہونی چاہئے۔