اسلام آباد(نیشنل ٹائمز)آزادکشمیر کے انتخابات کے لئے چیئرمین پیپلزپارٹی بلاول بھٹو زرداری کی طرف سے تشکیل دیا گیا پارلیمانی بورٹ کا اجلاس۔ پیپلزپارٹی شعبہ خواتین کی مرکزی صدر مسز فریال تالپور کی سربراہی میں پیر کو چوتھے روز بھی اجلاس جاری رہا۔ اجلاس سے خطاب کرتے ہوئے پیپلزپارٹی شعبہ خواتین کی مرکزی صدر مسز فریال تالپور نے کہا کہ پاکستان پیپلزپارٹی اور کشمیریوں کا آپ میں اٹوٹ رشتہ ہے۔ اس رشتے کی بنیاد قائد عوام ذوالفقار علی بھٹو شہید نے رکھی تھی۔ محترمہ بینظیر بھٹو شہید نے کشمیر کی آزادی کی لئے بھرپور آواز بلند کی تھی اور عالمی رہنماﺅں نے بھی مقبوضہ کشمیر کے عوام کے حق میں آواز بلند کی تھی۔ چیئرمین بلاول بھٹو زرداری کی صورت میں پیپلزپارٹی اور کشمیریوں کا رشتہ مزید مضبوط ہوگا۔ مسز فریال تالپور نے کہا کہ افسوس کہ مقبوضہ کشمیر میں ظلم ہوتا رہا ہے مگر کٹھ پتلی وزیراعظم خاموش رہے ہیں اگر آصف علی زرداری ملک کے صدر ہوتے تو مودی کشمیر میں ظلم کرنے کا سوچتا بھی نہیں۔ عمران خان کی مودی سے ملاقات کے جنون کی سزا کشمیریوں کو ملی ہے۔ کشمیر کے سلسلے میں جب قوم ایک صفحہ پر تھی تو عمران خان نے انتشار پھیلا کر قومی یکجہتی کو سبوتاژ کیا۔