اسلام آباد(نیشنل ٹائمز)وزیر خارجہ مخدوم شاہ محمود قریشی کا برلن میں پاکستانی سفارتخانے کا دورہ۔سفارت خانے پہنچنے پر جرمنی میں پاکستانی سفیر ڈاکٹر محمد فیصل اور سفارتخانے کے عملے نے وزیر خارجہ کا پرتپاک خیر مقدم کیا۔وزیر خارجہ نے قونصلر سیکشن سمیت سفارت خانے کے مختلف سیکشنز کا دورہ کیا اور پاکستانی کمیونٹی کو فراہم کی جانے والی سہولیات پر اطمینان کا اظہار کیا۔وزیر خارجہ نے کہا کہ جرمن میں مقیم ایک لاکھ سے زائد پاکستانی، مختلف شعبہ جات میں گرانقدر خدمات سرانجام دے رہے ہیں۔بیرون ملک مقیم پاکستانیوں کی فلاح و بہبود اور ان کو درپیش مسائل کا ترجیحی بنیادوں پر حل ہماری حکومت کی اولین ترجیحات کا حصہ ہے۔ وزیرخارجہ نے کرونا وبا کے دوران پاکستانی کمیونٹی کا خصوصی خیال رکھنے پر سفیر محترم اور سفارتخانے کے تمام عملے کو شاباش دی۔میونخ میں جلد نیا قونصل خانہ کھولنے جا رہے ہیں تاکہ جرمنی کے ساتھ دو طرفہ اقتصادی روابط کو مزید بڑھایا جا سکتا ہے۔جرمنی کے ساتھ دو طرفہ اقتصادی روابط بڑھانے کے بہت سے مواقع موجود ہیں ۔ وزیر خارجہ نے جرمن میں مقیم پاکستانیوں کے دیرینہ مطالبے پر سفارت خانے میں کھولے گئے دفتر “عرضی نویسی” کا افتتاح کیا ۔وزیر خارجہ نے سفارت خانے میں قائم کیے گئے “۔فٹ بال کارنر” کا بھی افتتاح کیایہ امر قابل مسرت ہے کہ جرمنی میں ہر سال پانچ کروڑ فٹبال پاکستان سے درآمد کیے جاتے ہیں۔وزیر خارجہ نے کہا کہ معاشی سفارت کاری کے بہترین نتائج برآمد ہو رہے ہیںجرمنی کے ساتھ معاشی تعلقات میں نئے باب کا اضافہ،ہماری معاشی سفارتی مہم کے مثبت ثمرات کا عملی ثبوت ہے ۔وزیر خارجہ نے سفارتی عملے سے خطاب کیا اور انہیں اہم ہدایات دیں۔وزیر خارجہ نے سفارت خانے میں رکھی “وزٹرز بک” میں اپنے تاثرات قلمبند کئے۔