اسلام آباد(نیشنل ٹائمز)وزارتِ خارجہ میں عراق کے فارن سروس انسٹیٹیوٹ اور فارن سروس اکیڈمی پاکستان کے مابین تعاون کے حوالے سے مفاہمتی یادداشت پر دستخط کی تقریب ۔مفاہمتی یادداشت پر ڈائریکٹر جنرل فارن سروسز اکیڈمی عمران مرزا اور عراقی انسٹیٹیوٹ آف فارن سروس کے ڈین و انڈر سیکرٹری ڈاکٹر صالح حسین علی ال تمیمی نے دستخط کئے۔وزیر خارجہ مخدوم شاہ محمود قریشی ،سیکرٹری خارجہ سہیل محمود اور پاکستان میں تعینات عراقی سفیر حامد عباس لفطہ نے مفاہمتی یادداشت پر دستخط کی تقریب کو ملاحظہ کیا۔مفاہمتی یادداشت کے مطابق فارن سروسز اکیڈمی عراقی سفراء/ ڈپلومیٹس کو سفارت کاری کی تربیت فراہم کریگی ۔ اس موقع پر شاہ محمو د قریشی کا کہنا تھا کہ مجھے خوشی ہے کہ پاکستان کی فارن سروسز اکیڈمی اب تک 63 عراقی ڈپلومیٹس کو عملی سفارت کاری کی تربیت دے چکی ہے ۔انہوں نے مزید کہا کہ ڈپلومیٹس کی تربیت کے حوالے سے یہ مفاہمتی یادداشت، دونوں ممالک کے درمیان اداروں کی سطح پر روابط کے فروغ میں معاون ثابت ہو گی ۔