اسلام آباد(نیوز ڈیسک)برطانوی اداکار اور کامیڈین لینی ہینری اور دیگر اہم شخصیات نے سیاہ فام برطانوی افراد سے کورونا سے بچاؤ کی ویکسین لگوانےکی اپیل کی ہے۔ان اہم شخصیات کی جانب سے اپیل اس وقت کی گئی جب برطانیہ میں کورونا سے بچاؤ کی ویکسین لینے والے عام افراد کے مقابلے میں سیاہ فام کمیونٹی کی تعداد میں واضح کمی دیکھی گئی۔لینی ہینری نے ایک کھلے خط میں سیاہ فام کمیونٹی سے کورونا سے بچاؤ کی ویکسین لینے کی اپیل کی جبکہ دیگر اہم شخصیات کی جانب سے اسی طرح کی ایک ویڈیو بھی ٹی وی پر نشر کی جائے گی۔لینی ہینری نے کہا ہے کہ میں چاہتا ہوں کہ لوگ محفوظ رہیں۔ میں نہیں چاہتا کہ لوگ کورونا کی وجہ سے مریں یا پھر انہیں اسپتال جانا پڑے۔ اس لئے جب آپ کی باری آئے تو ویکسین لیں۔رپورٹس کے مطابق برطانیہ میں 30 ملین سے زائد لوگوں نے کورونا سے بچاؤ کی ویکسین کی پہلی خوراک لے لی ہے۔