لاہور(نیوز ڈیسک ):بالی ووڈ کی ہٹ فلموں میں مرکزی کردار ادا کرنے والے اداکار منوج باجپائی کا کہنا ہے کہ نیشنل ایوارڈ ماضی میں ہونے والی غلطیوں کو بھلا دیتا ہے۔ منوج باجپائی جنھیں اس دفعہ ان کے کیریئر کا تیسرا نیشنل ایوارڈ ان کی 2019 کی فلم ’بھونسلے‘ میں بہترین اداکاری پر ملا ہے۔ حال ہی میں کورونا وائرس سے صحت یاب ہونے والے منوج نے اس ایوارڈ کے حوالے سے گفتگو کرتے ہوئے کہا کہ وہ اس پر بہت خوش ہیں اور خوشی صرف اپنے حوالے سے نہیں بلکہ اپنے ڈائریکٹر دیو اشیش مکھیجا کی کاوشوں پر بھی ہے انھوں نے اپنی تمام تر صلاحیت اور توانائی صرف کی۔ جبکہ سندیپ کپور، پیوش سنگھ اور تمام پروڈیوسرز جنھوں نے فلم کی کامیابی کے لیے محنت کی ان سب کا شکر گزار ہوں۔ منوج نے کہا کہ ماضی میں کافی بار ایسا ہوا کہ میری فلمیں ایوارڈ کی مستحق تھیں لیکن ایوارڈ نہ ملا، لیکن اب میں ماضی میں نہیں جانا چاہتا اور بھونسلے کی کامیابی نے سب کچھ بھلا دیا ہے۔