اسلام آباد (نیوز ڈیسک) کورونا سے بچاؤ کی روسی ویکسین اسپوٹنک کی قیمت میں اضافے کی درخواست مسترد کردی گئی۔وفاقی وزیر اسد عمر نے جیو نیوز کے پروگرام ’’آج شاہزیب خانزادہ کے ساتھ‘‘ گفتگو میں بتایا کہ ڈریپ نے نجی کمپنی کی درآمد کردہ ویکسین کی قیمت آٹھ ہزار چار سو انچاس روپے ہی برقرار رکھنے کا فیصلہ کیا ہے۔ویکسین درآمد کرنے والوں نے حکومتی نرخ کو کم قرار دے کر نرخ بڑھانے کا مطالبہ کیا تھا۔نجی کمپنی روسی ویکسین کی پچاس ہزار خوراک پاکستان منگوا چکی جو اس وقت کولڈ اسٹوریج میں رکھی ہیں۔ویکسین لگوانے والوں کا پیغام ہے کہ اگر پاکستان میں معمول کی زندگی کی واپسی چاہتے ہیں تو ویکسین کو ہاں– کورونا کو ناں کرنا ہوگا۔