اسلام آباد (نیوز ڈیسک)پاکستان شوبز انڈسٹری کی سینئر اداکارہ و میزبان ثمینہ پیرزادہ نے عوام سے کورونا ویکسین لگوانے کی اپیل کی ہے۔ثمینہ پیرزادہ نے مائیکرو بلاگنگ سائٹ ٹوئٹر پر جاری کیے اپنے پیغام میں کہا کہ ’اپنا خیال رکھیں کیونکہ کورونا وائرس کی تیسری اور خطرناک لہر پاکستان میں بھی آگئی ہے۔‘سینئر اداکارہ نے کہا کہ ’کورونا وائرس ایس او پیز کا خیال رکھیں اور ماسک لازمی پہنیں۔‘اُنہوں نے عوام سے اپیل کرتے ہوئے کہا کہ ’براہِ کرم کورونا ویکسین بھی لازمی لگوائیں۔‘واضح رہے کہ پاکستان میں گزشتہ 24 گھنٹوں کے دوران کورونا وائرس کے مزید 3 ہزار669کیسز سامنے آئے ہیں، مزید 20 افراد اس موذی وباء کے سامنے زندگی کی بازی ہار گئے، جبکہ اس بیماری سے 1 ہزار 686 مریض شفایاب ہو گئے۔ملک بھر میں کورونا وائرس سے انتقال کرنے والوں کی مجموعی تعداد 13 ہزار863ہو گئی ہے، جبکہ کُل مریضوں کی تعداد 6 لاکھ 30 ہزار471ہو چکی ہے۔دوسری جانب وزیراعظم عمران خان اور اُن کی اہلیہ و خاتون اوّل بشریٰ بی بی کا بھی کورونا وائرس ٹیسٹ مثبت آیا ہے جس کے بعد اُنہوں نے خود کو قرنطینہ کرلیا ہے۔