نیویارک (اُردو پوائنٹ، تازہ اخبار، 27 فروری 2021) اقوام متحدہ میں میانمار کے سفیر کو برطرف کر دیا گیا، تفصیلات کے مطابق میانمار پر قابض فوج نے اقوام متحدہ میں تعینات اپنے سفیر کو بغاوت کا الزام لگا کر برطرف کیا۔ بتایا گیا ہے کہ میانمار کے اقوام متحدہ میں تعینات سفیر نے اقوام متحدہ سے مطالبہ کیا تھا کہ میانمار کی فوج کے خلاف کارروائی کی جائے، اس بیان کی وجہ سے ان پر حکومت کے خلاف بغاوت کا الزام عائد کر کے میانمار پر قابض فوجی حکومت نے برطرف کر دیا۔

خیال رہے کہ میانمار کی فوج نے آنگ سان سوچی کو گرفتار کر کے جمہوری حکومت کا تختہ اُلٹا دیا تھا اور خود حکومت پر قبضہ جما لیا تھا۔ میانمار پر فوجی حکومت کے قبضے پر دنیا بھر سے جمہوری حکومتوں نے میانما رکی فوج کو تنقید کا نشانہ بنایا اور آنگ سان سوچی کو رہا کر کے جمہوری حکومت بحال کرنے کا مطالبہ کیا تھا۔

ملک بھر میں احتجاج بھی جاری ہیں اور فوج اپنے عوام کے خلاف کارروائی کرنے سے بھی نہیں کترا رہی۔ خیال رہے کہ رواں ماہ کی یکم تاریخ کو میانمار کی فوج نے ملک کا کنٹرول سنبھالنے کا اعلان کیا تھا۔فوج نے برسراقتدار جماعت ’نیشنل لیگ آف ڈیموکریسی‘ کی رہنما آنگ سانگ سوچی اور دیگر سیاسی رہنماؤں کو بھی گرفتار کرلیا تھا۔