کراچی (نیشنل ٹائمز)وفاقی تحقیقاتی ادارے (ایف آئی اے) کے سائبر سرکل نے صوبہ سندھ میں کارروائی کے بعد جعل سازی کے ذریعے موبائل سمز فروخت کرنے والے گروہ کو گرفتار کرلیا۔ایف آئی اے سائبر سرکل حکام کے مطابق ملزمان سمز کے نیٹ ورک تبدیل کرکے جرائم پیشہ عناصر کو فروخت کرنے میں ملوث ہیں، ملزمان نے جعلی این جی او بنائی ہوئی تھی اور سادہ لوح شہریوں کو مختلف جھانسے دے کر انگوٹھوں کے نشان حاصل کرلیتے تھے، ضلع تھرپار کر میں جعلی این جی او چلانے والے چار ملزمان کو گرفتار کرلیا، ملزمان سادہ لوح افراد کو مختلف اسکیموں کا جھانسہ دے کر سادہ کاغذ پر انگوٹھوں کے نشان حاصل کرتے اور بی وی ایس ڈیوائس کے ذریعے سمز کا اجرا کرتے تھے۔ملزمان کی نشاندہی پر ایف آئی اے نے دو مختلف ٹیلی کا م فرنچائزز پر چھاپا بھی مارا، فرنچائز اوونر اپنا ٹارگٹ پورا کرنے کے لئے جعلی طریقے سے سمز فروخت کررہے تھے۔حکام کے مطابق ملزمان سموں کے نیٹ ورک تبدیل کرکے جرائم پیشہ عناصر کو فروخت کرتے اور رقم کماتے تھے، نیٹ ورک تبدیل کرنے کے باعث نمبر کا ڈیٹا نہیں مل پاتا جبکہ حالیہ دھرنوں میں بھی ایسی ہی سمز کے ذریعے سیکیورٹی فورسز کے خلاف سوشل میڈیا پر ٹرینڈز بنائے گئے تھے، گرفتار ملزمان کی تعداد 11 ہے جن کے قبضے سے بڑی تعداد میں ڈیوائسز، سمز اور دیگر چیزیں برآمد کی گئی ہیں، گروہ کا ماسٹر مائنڈ اب بھی فرار ہے۔