اسلام آباد(نیشنل ٹائمز)سابق صدر مملکت اور پاکستان پیپلزپارٹی پارلیمنٹیرینز کے صدر آصف علی زرداری نے سانحہ 18 اکتوبر کے شہداء کو خراج عقیدت پیش کرتے ہوئے ہے کہ محترمہ بینظیر بھٹو شہید کے جانثاروں اورجیالوں کی جانوں کے نذرانہ سے جمہوریت کا سورج طلوع ہوا ۔ میڈیا آفس اسلام آباد سے جاری ہونے والے بیان میں سابق صدر آصف علی زرداری نے کہا ہے کہ شہید محترمہ بے نظیر بھٹو کی شدت پسندوں اور وطن دشمنوں سے جنگ تھی اور شہید محترمہ عوام کا استحصال کرنے والوں سے مزاحمت کا نام ہے ۔آصف زرداری نے کہا کہ محترمہ بینظیر بھٹو شہید نے زندگی بھر 1973 کے آئین کی بحالی ، بااختیار پارلیمنٹ اور عوام کے حقوق کیلئے جدوجہد کی۔انہوں نے کہا کہ 18 ویں آئینی ترمیم محترمہ بے نظیر بھٹو شہید کے خوابوں کی تعبیر ہے ۔ سابق صدر نے کہا کہ پاکستان پیپلزپارٹی کچلے ہوئے طبقات کی نمائندہ اور وکیل ہے پیپلزپارٹی طبقاتی ناانصافیوں کے خلاف جنگ لڑتی رہے گی ۔