منیلا(نیشنل ٹائمز): فلپائن نے پاکستان اور متحدہ عرب امارات سمیت 10 ممالک کو ’’کورونا ریڈ لسٹ‘‘ سے نکال دیا ہے۔برطانوی خبر رساں ادارے کے مطابق فلپائن کے صدر روڈریگو ڈیویٹرٹے نے 10 ممالک پر سے اپریل میں عائد کی گئی سفری پابندیاں اُٹھانے کا اعلان کیا ہے ان ممالک میں پاکستان بھی شامل ہے۔فلپائن کے صدارتی ترجمان کی جانب سے جاری بیان میں کہا گیا ہے کہ جن ممالک پر سے سفری پابندیاں اُٹھائی گئی ہیں اُن میں پاکستان، متحدہ عرب امارات، بنگلا دیش، سری لنکا، نیپال، عمان، تھائی لینڈ، بھارت اور ملائشیا شامل ہیں۔بیان میں مزید کہا گیا ہے کہ ان ممالک سے آنے والے مسافروں کو 14 دن قرنطینہ میں گزارنا ہوں گے جب کہ اس سے قبل ان ممالک سے آنے والے مسافروں کو فلپائن میں داخل ہونے پر مکمل پابندی عائد تھی۔واضح رہے کہ فلپائن میں کورونا سے ہلاک ہونے والوں کی تعداد 33 ہزار سے زائد ہوگئی ہے جب کہ اس مہلک وائرس سے متاثر ہونے والوں کی مجموعی تعداد 20 لاکھ 20 ہزار اور 484 ہے اور اب تک 3 کروڑ سے زائد کورونا کی خوراکیں لگائی جا چکی ہیں۔