اسلام آباد(نیشنل ٹائمز) امریکا نے اپنے عوام کو کورونا ویکسین لگوانے کے 8 ماہ بعد ایک بوسٹر ویکسین لگوانے کا فیصلہ کیا ہے، تاہم اس بارے میں حتمی فیصلہ فوڈ اینڈ ڈرگ ایڈمنسٹریشن کرے گی۔ذرائع کے مطابق سب سے پہلے بوسٹر یا ویکسین کی تیسری خوراک شعبۂ صحت کے کارکنوں کو اور اس کے بعد بزرگ افراد کو لگائی جائے گی۔تیسری خوراک فائزر، بایو این ٹیک یا موڈرنا کی دو خوراکیں لینے والوں کو لگائی جائے گی۔اس سے قبل امریکا میں فائزر اور موڈرنا کی پہلی خوراک پچھلے سال دسمبر میں دینا شروع کی گئی تھی اور جنوری کے اختتام تک 50 لاکھ امریکی شہری فائزر یا موڈرنا ویکسین لگوا چکے تھے جو ستمبر میں تیسری خوراک حاصل کر سکیں گے۔اس کے علاوہ جونسن اینڈ جونسن ویکسین کی ایک ہی خوراک کو کافی قرار دیا گیا تھا، مگر اب اس کی بھی ایک اور خوراک لگائی جائے گی۔