گوجرانوالہ(نیشنل ٹائمز)گوجرانوالہ میں لیگی ایم پی اے توفیق بٹ کے خلاف تھانہ دھلے میں چوری کا مقدمہ درج کرلیا گیا۔ مقدمہ پارکس اینڈ ہارٹی کلچر اتھارٹی (پی ایچ اے) کے کئیر ٹیکر محمد عرفان کی مدعیت میں درج کیا گیا جس کے مطابق توفیق بٹ نے اپنے 8 نامعلوم ساتھیوں کے ساتھ گرین بیلٹ پر دھاوا بول دیا، توفیق بٹ نے ہمارے 500 سے ایک ہزار پودے اور 8 عدد فلیکسیز چوری کر لیے۔ ایف آئی آر کے مطابق لیگی ایم پی اے ساتھیوں کے ساتھ چوری کر کے سامان رکشہ پر لوڈ کر کے لے گئے۔ لیگی ایم پی اے نے ہمارے پودے زبردستی چھین لیے تاکہ ورلڈ ریکارڈ قائم نہ ہو سکے۔ دوسری طرف مقدمہ درج ہونے پر مقامی لیگی قیادت نے تشویش کا اظہار کیا ہے۔