اسلام آباد(نیشنل ٹائمز) وفاق المدارس العربیہ پاکستان کے قائدین مولانا انوار الحق، مولانا محمد حنیف جالندھری اور دیگر نے افغانستان میں طالبان کی فتح پر قوم سے اظہارِ تشکر اور دعا کی اپیل کی ہے،انہوں نے طالبان کی فتح کو امت مسلمہ کی اجتماعی فتح قرار دیا اور طالبان کی پرامن پیش رفت کو دانشمندی اور حکمت کی مثال قرار دیا،وفاق المدارس کے قائدین نے کہا کہ دینی مدارس کے وابستگان نے اسوہ حسنہ پر عمل کرتے ہوئے فتح مکہ کی یادیں تازہ کردیں،وفاق المدارس کے قائدین نے قوم سے اپیل کی کہ خصوصی دعاؤں کا اہتمام کریں تاکہ طالبان کو استحکام نصیب ہو اورامت کو اسلامی نظام کی بہاریں دیکھنا نصیب ہوں تفصیلات کے مطابق وفاق المدارس العربیہ پاکستان کے قائدین مولانا انوار الحق ،مولانا محمد حنیف جالندھری اور دیگر نے افغانستان میں طالبان کی فتح پراظہار تشکر اور دعا  کی اپیل کی ہے،وفاق المدارس کے قائدین نے طالبان کی فتح کو امت مسلمہ کی اجتماعی فتح قرار دیا-انہوں نے کہا کہ طالبان کی فتح اللہ ربّ العزت کی مددو نصرت کا کرشمہ ہے-وقت نے ثابت کر دیا کہ جارحیت اور ظلم کو بالآخر شکست سے دوچار  ہونا پڑتا ہے-وفاق المدارس کے قائدین نے طالبان کی پرامن پیش رفت کو حکمت و بصیرت کی مثال قرار دیا اور کہا کہ طالبان نے عام معافی اور درگزر کا اعلان کر کے جس طرح اسوہ حسنہ ہر عمل کیا اس نے فتح مکہ کی یاد تازہ کر دی ہے-وفاق المدارس کے قائدین نے قوم سے اپیل کی کہ وہ طالبان کی فتح پر شکرانے کے نوافل ادا کریں اور خصوصی دعاؤں کا اہتمام کریں کہ اللہ ربّ العزت ہر قسم کی بدامنی اور خون خرابے سے حفاظت فرمائیں اور اسلامی نظام کی بہاریں دیکھنا نصیب فرمائیں اور دشمن کی ہرقسم کی چالوں کو ناکامی سے دوچار فرمائیں۔ آمین
جاری کردہ: عبدالقدوس محمدی میڈیا سنٹر وفاق المدارس العربیہ پاکستان