اسلام آباد(نیشنل ٹائمز) بیرون ملک پاکستانیوں تک رسائی کے اقدام کے تحت 14 اگست پر یوم جشن آزادی کی مناسبت سے وزیر خارجہ مخدوم شاہ محمود قریشی نے 25 بیرون ملک مقیم پاکستانیوں کی اپنے متعلقہ شعبوں میں نمایاں خدمات کا اعتراف کرتے ہوئے انہیں وزیر خارجہ کی ’آنرزلسٹ‘ کی اشاعت دوم میں شامل کیاہے۔ اسی اقدام کے تحت اشاعت اول (2020) میں ان بیرون ملک پاکستانیوں کی خدمات کا اعتراف کیاگیا تھا جنہوں نے کورونا وبا کے دوران انسانیت کے لئے غیرمعمولی خدمات انجام دی تھیں۔ رواں برس ”40 سال سے کم عمر رہنما‘ کے عنوان سے دنیا بھر میں کارہائے نمایاں انجام دینے والے نوجوان پاکستانیوں کی خدمات کا اعتراف کیاگیا ہے۔ اس ایوارڈ کے لئے انتخاب ان شخصیات کے پیشہ وارانہ قیادت کے بھرپور تخلیقی ریکارڈ، خدمات عامہ، سائنس وایجادات، کاروبار، کھیل، فنون لطیفہ اور ثقافت کے شعبوں میں غیرمعمولی خدمات وکارگزاری کی بنیاد پر کیاگیا۔ وزارت خارجہ کے زیراہتمام منعقدہ ’ویبنار‘ میں ایوارڈ کے لئے منتخب ہونے والی شخصیات سے نشست میں وزیر خارجہ مخدوم شاہ محمود قریشی نے کہاکہ ان شخصیات نے نہایت کم عمری میں اتنی بھرپور کامیابیاں حاصل کی ہیں، یہ امر نہایت متاثر کن ہے۔ یہ نوجوان پاکستانی وطن عزیز کے لئے سرمایہ افتخار ہیں۔ انہوں نے کہاکہ 90 لاکھ سے زائد بیرون ملک مقیم پاکستانی وطن عزیز کے حقیقی سفیر ہیں۔ وزیر خارجہ کی ’آنرزلسٹ‘ (فہرستِ افتخار)سال 2020 میں ’وژن فارن آفس‘ کے تحت جاری کی گئی تھی جس کا مقصد کلیدی سٹیک ہولڈرز تک رسائی اور ان کے ساتھ رابطوں کو وسعت دینا تھا۔ فہرستِ افتخار اور ایوارڈ حاصل کرنے والوں کی کاوشوں سے متعلق خلاصہ وزارت امور خارجہ کی سرکاری ویب سائٹ www.mofa.gov.pk پر دستیاب ہے۔