اسلام آباد(9اگست 2021) پاکستان پیپلزپارٹی کے مرکزی سیکریٹری اطلاعات فیصل کریم کنڈی نے شیخ رشید کی میڈیا ٹاک پر ردعمل کا اظہار کرتے ہوئے کہا ہے کہ شیخ رشید سیاسی تاریخ کو مسخ کرنے کی کوشش نہ کرے۔ قائد عوام شہید ذوالفقار علی بھٹو کا عدالتی قتل آج بھی قوم کے دل پر گہرا زخم ہے۔ شہید ذوالفقار علی بھٹو دنیا کے واحد سیاستدان ہیں جن کو دی جانے والی پھانسی پر ان کے کئی جانثاروں نے خودسوزی کی۔ بہت حوصلے کے ساتھ تختہ دار پر گئے اور پھانسی کے پھندے اور تختہ دار پر بھی جئے بھٹو کا نعرہ بلند کیا۔ شہید ذوالفقار علی بھٹو کے لاکھوں جیالوں نے قید اور تشدد برداشت کیااور اقتدار کے لالچی ٹولے کے خلاف بے مثال جدوجہد کرتے رہے۔ فیصل کریم کنڈی نے کہا کہ

محترمہ بینظیر بھٹو شہید اور مادر جمہوریت نے اقتدار پر قابض ٹولے کے غیرآئینی، غیراصولی اور ناجائز اقتدار کے خلاف بھرپور جدوجہد کی۔ فیصل کریم کنڈی نے کہا کہ 4اپریل 1979ءکو شہید ذوالفقار علی بھٹو کی صورت میں وطن کی آزادی، خودداری اور خود مختاری کو سولی پر چڑھایا گیا تھا۔ انہوں نے کہا کہ شہید بھٹو کے کروڑوں عقیدت مند آج بھی زندہ ہیں جبکہ شیخ رشید جیسے لاوارثوں کے پیچھے کوئی بھی نہیں ہوگا۔