اسلام آباد (نیشنل ٹائمز) پیپلزپارٹی نےقومی سلامتی کمیٹی کا اجلاس بلانے کا مطالبہ کر دیا۔پیپلزپارٹی کے سینئر رہنما سید نئیر حسین بخاری نےکہا کہ افغانستان کی صورتحال پر حکومت کی خاموشی انتہائی افسوسناک اور قابل تشویش ہے۔حکومت کی اس طرح خاموشی کے خطرناک نتائج نکل سکتے ہیں۔حکومت افغانستان کی صورتحال کی پیش نظر اپنی حکمت عملی واضح کرے۔قومی سلامتی کمیٹی کا ایک اہم اجلاس ہوا تھا۔قومی سلامتی کمیٹی کا ایک اور اجلاس عید سے قبل ہونا تھا جو تاحال نہیں ہو سکا۔انہوں نے مطالبہ کیا کہ قومی سلامتی کمیٹی کا اجلاس بلاکر حکمت عملی واضح کی جائے۔وڈیوز میں خیبرپختونخوا اور کوئٹہ میں طالبان کو خوش آمدید کہنے کے لئے ریلیاں نکالی گئیں۔حکومت نے کوئی نوٹس لیا نہ ہی کسی کے خلاف کارروائی ہوئی۔انہوں نے تنبیہہ کی کہ حکومت سنجیدگی کا مظاہرہ کرے، صورتحال کو اس طرح نظرانداز کرنا مناسب نہیں ہوگا۔