لاہور (آئی این پی ) لاہور کی ضلع کچہری نے رنگ روڑ راولپنڈی منصوبے میں مبینہ کرپشن اور بے ضابطگیوں کے کیس میں گرفتار سابق کمشنر راولپنڈی محمد محمود اور پروجیکٹ ڈائریکٹر وسیم تابش کو جوڈیشل ریمانڈ پر جیل بھیج دیا۔ بدھ کو گرفتار ملزمان کو جسمانی ریمانڈ مکمل ہونے پر عدالت میں پیش کیا گیا۔ اینٹی کرپشن نے ملزمان کے جسمانی ریمانڈ میں توسیع کی استدعا کی اور کہا کہ ملزمان سے تفتیش مکمل کرنی ہے۔ دوران سماعت سابق کمشنر روسٹرم پر آئے اور کہا کہ تیرہ دن کے ریمانڈ میں اینٹی کرپشن والے کچھ نہیں نکال سکے۔ ایک دن کا ریمانڈ رہتا ہے وہ بھی دے دیں تاکہ انکی کوئی حسرت نہ رہ جائے۔ سرکاری وکیل کی جسمانی ریمانڈ کی استدعا پر جوڈیشل مجسٹریٹ نے کہا کہ تیرہ دن میں جو نہیں کیا تو اینٹی کرپشن ایک دن میں کیا کر لیں گے۔ عدالت نے اینٹی کرپشن کی مزید جسمانی ریمانڈ کی استدعا مسترد کردی اور سابق کمشنر راولپنڈی محمد محمود اور وسیم تابش کو جوڈیشل ریمانڈ پر جیل بھیج دیا۔ عدالت نے چودہ روز بعد ملزمان کو دوبارہ عدالت کے روبرو پیش کرنے کا حکم دے دیا۔