راولپنڈی(آئی این پی ) وفاقی وزیر داخلہ شیخ رشید نے کہا ہے کہ راولپنڈی میں نالہ لئی واحد مسئلہ ہے تاہم نالہ لئی منصوبے کے افتتاح کی خوش خبری نوے دنوں کے اندر دیں گے ۔ وفاقی وزیر داخلہ شیخ رشید نے نالہ لئی کا دورہ کیا ۔ اس موقع پر میڈیا نمائندوں سے گفتگو کرتے ہوئے وزیر داخلہ نے کہا کہ فوج ، واسا اور کارپوریشن کے ساتھ انتظامیہ الرٹ ہے ۔واسا ، ریسکیو ، پولیس ، فوج اور مقامی انتظامیہ نگرانی کے لیے موجود ہے ۔ ان کا کہنا تھا کہ نالہ لئی راولپنڈی کا واحد مسئلہ ہے ۔ اس سال نالہ لئی کا منصوبہ شروع ہوگا ۔ نالہ لئی منصوبہ شروع کیا تھا تو چھبیس ارب کا تھا اب نوے ارب تک پہنچ گیا ہے۔ نالہ لئی منصوبے کے افتتاح کی خوش خبری نوے دنوں کے اندر دیں گے۔