اسلام آباد(نیشنل ٹائمز)پاکستانی ڈرامہ انڈسٹری کے معروف اداکار انور اقبال طویل علالت کے بعد انتقال کر گئے۔نجی ٹی وی کے مطابق پاکستان ٹیلی وژن کے سینئر ترین اداکار محمد انور اقبال بلوچ انتقال کر گئے۔ انور اقبال کے داماد نے انتقال کی خبر کی تصدیق کرتے ہوئے مداحوں سے گزارش کی کہ مرحوم کے لیے دعائیں کریں۔یاد رہے کہ انور اقبال کی طبیعت کافی عرصے سے ناساز تھی اورکراچی کے ایک ہسپتال میں ان کا علاج جاری تھا، اہل خانہ کے مطابق انور اقبال گردوں کی تکلیف میں ایک عرصے سے مبتلا تھے۔ سینئر آرٹسٹ انور اقبال نے پاکستان ٹی وی نڈسٹری کے ٹاپ کلاس ڈراموںشمع اور آخری چٹان سے بے پناہ شہرت حاصل کی، وہ ڈرامہ انڈسٹری کے معروف اداکار تھے، انہوں نے اردو اور سندھی کے کئی ڈراموں میں یادگار کردار ادا کیے۔چند روز قبل ان کی ہسپتال سے ایک تصویر وائرل ہوئی تھی جس میں وہ کافی کمزور دکھائی دے رہے تھے ، تصویر کے وائرل ہونے پر انہوں نے شدید برہمی کا اظہار بھی کیا تھا۔