اسلام آباد (نیشنل ٹائمز) وزیرخارجہ شاہ محمود قریشی نے کہا ہے کہ پاکستان بھارت کیساتھ امن چاہتا ہے لیکن مسئلہ کشمیر سے آنکھ نہیں چراسکتا۔جمعرات کو وزیرخارجہ شاہ محمود قریشی نے نجی ٹی وی پروگرام میں گفتگو کرتے ہوئے بتایا کہ بدھ کو وزیراعظم نے قومی اسمبلی میں تقریر کرتے ہوئے حکومتی پالیسی واضح کردی ہے۔وزیراعظم نے ان مشکلات کابھی ذکرکیاجو حکومت سنبھالتے وقت درپیش تھیں۔ انھوں نے کہا کہ وزیراعظم نے بتایا ہے کہ پاکستان کی عالمی سطح پر قربانیوں کا اعتراف نہیں کیا گیا ہے۔ افغانستان سے50 سے60 فیصد امریکی فوجیوں کا انخلا ہوچکا ہے اور پاکستان نہیں چاہتا کہ افغانستان میں مزید جنگ ہو،پاکستان وہاں امن چاہتا ہے۔ وزیرخارجہ نے مزید کہا کہ امریکہ بھی آج قائل ہوگیا ہے کہ افغانستان کے مسئلے کا حل فوجی نہیں ہے۔ انھوں نے کہا کہ نئے معاہدے سے پاکستان اور افغانستان کے درمیان تجارت کا حجم کئی گنا بڑھ سکتا ہے۔پاکستان اور امریکا کے درمیان تعلقات بہت اچھے ہیں۔