اسلام آباد (نیشنل ٹائمز) نیدرلینڈ کیلئے پاکستان کے نامزد سفیر سلجوق مستنصر تارڑ کی وزارتِ خارجہ میں وزیر خارجہ مخدوم شاہ محمود قریشی سے ملاقات۔وزیر خارجہ نے بطورِ سفیر نیدرلینڈ نامزدگی پر ایمبیسڈر سلجوق تارڑ کو مبارکباد دی ۔وزیر خارجہ شاہ محمود قریشی نے کہا کہ آپ ایسے وقت میں بطور سفیر ذمہ داریاں سنبھالنے جا رہے ۔جب پاکستان کو سفارتی محاذ پر بہت سے چیلنجز کا سامنا ہے۔ آپ کی بطورِ سفیر تقرری آپ کی کارکردگی اور اہلیت کو پیش نظر رکھتے ہوئے کی گئی ہے۔ امید ہے کہ آپ جیسے منجھے ہوئے سفارت کار کی نیدرلینڈ میں بطور سفیر تقرری سے، پاکستان اور نیدرلینڈ کے مابین سیاسی، اقتصادی، تجارتی و کثیرالجہتی دو طرفہ تعلقات ،مزید مستحکم ہوں گے۔نیدرلینڈ کیلئے پاکستان کے نامزد سفیر سلجوق مستنصر تارڑ نے وزیر خارجہ کا شکریہ ادا کرتے ہوئے پاکستان اور نیدرلینڈ کے مابین دو طرفہ تعلقات کے استحکام کیلئے اپنی تمام کاوشیں بروئے کار لانے کی یقین دہانی کروائی۔نیدرلینڈ کیلئے نامزد سفیر سلجوق مستنصر تارڑ نے اپنی حال ہی میں منظر عام پر آنے والی کتاب “All That Art” وزیر خارجہ کو پیش کی۔