اسلام آباد(نیشنل ٹائمز) پاکستان انٹرنیشنل ایئرلائن پی آئی اے کو کینیڈا کیلئے براہ راست پروازیں چلانے کی اجازت مل گئی،تفصیلات کے مطابق کینیڈین حکام کی جانب پی آئی اے کو دوبارہ براہ راست پروازیں شروع کرنے کی ہدایات موصول ہو گئی ہیں اور 22جون سے پی آئی اے براہ راست مسافروں کو لے کر کینیڈا جاسکے گی،کینیڈین حکام نے پی آئی اے کے چیف ایگزیکٹو ائیر مارشل ارشد ملک کی وضع کردہ ایس او پی پر اطمینان کا اظہار کرتے ہوئے براہ راست پروازوں کی اجازت کا فیصلہ کیا،پی آئی اے پہلے مرحلے میں ہفتہ وار تین پروازیں اتوار سے شروع کرے گا اور دوسرے مرحلے میں پاکستان سے کینیڈا کا آپریشن مکمل طور پر بحال کردیا جائے گا،ترجمان پی آئی اے کے مطابق پروازیں کراچی، لاہور اور اسلام آباد سے روانہ ہوں گی پروازوں پر بکنگ کھول دی گئی ہے اور لوگ بآسانی نشستیں حاصل کرسکتے ہیں،واضح رہے کہ پروازیں کوویڈ کی پابندیوں کے باعث صرف کارگو تک محدود کردی گئی تھیں۔