اسلام آباد(نیشنل ٹائمز)سابق وزیراعظم محترمہ بینظیر بھٹو شہید کی سالگرہ کی تقریب سینیٹ میں قائد حزب اختلاف سید یوسف رضا گیلانی کے چیمبر میں منعقد ہوئی جس میں سابق وزیراعظم راجہ پرویز اشرف، پیپلزپارٹی کی پارلیمانی لیڈر سینیٹر شیری رحمان، سینیٹر سلیم مانڈوی والا ، سینیٹر فاروق نائیک، سینیٹر شہادت اعوان، سینیٹر رخسانہ زبیری،سینیٹر سکندر میندرو، سینیٹر امام دین شوقین، سینیٹر بہرامند تنگی سمیت دیگر سینٹروں نے بھی شرکت کی۔ تقریب کے آغاز میں پشتون خواہ ملی کے رہنما سینیٹر عثمان کاکڑ کے لئے فاتحہ خوانی کی گئی۔ بعد میں سینیٹ میں قائد حزب اختلاف سید یوسف رضا گیلانی نے تقریب سے خطاب کرتے ہوئے محترمہ بینظیر بھٹو شہید کو خراج عقیدت پیش کرتے ہوئے کہا کہ شہید بی بی نے زندگی بھر ملک میں پارلیمان کی بالادستی اور آئین کی بحالی کے لئے جدوجہد کی۔ شہید بی بی نے ملک اور عوام کے لئے بے انتہامشکلات برداشت کیں۔ سید یوسف رضا گیلانی نے کہاکہ محترمہ بینظیر بھٹو شہید کے کارکن بڑی سے بڑی قربانی تو دے سکتے ہیں مگر آئین کے تقدس پر آنچ نہیں آنے دیتے۔ تقریب میں محترمہ بینظیر بھٹو شہید کے ایصال ثواب کے لئے دعا کرنے کے بعد ان کی سالگرہ کا کیک کاٹا گیا۔ درایں اثناءسینیٹر شیری رحمن کی طرف سے سینیٹ کی لابی میں بھی محترمہ بینظیر بھٹو شہید کی سالگرہ کا کیک کاٹا گیا۔ ادھر پاکستان پیپلزپارٹی کے سنٹرل سیکریٹریٹ سمیت سید محمد علی شاہ کی رہائش گاہ پر بھی سالگرہ کی تقریب منعقد ہوئی جبکہ سالگرہ کی کئی تقریبات راولپنڈی شہر میں منعقد کی گئیں جس میں محترمہ بینظیر بھٹو شہید کو شاندار خراج عقیدت پیش کیا گیا۔