اسلام آ باد (نیشنل ٹائمز ) تحریک انصاف آزاد کشمیر نے مسلم لیگ (ن) کی ایک اور اہم وکٹ گرا دی‘ (ن) لیگ کے رہنما و وزیر جنگلات سردار میر اکبر خان بھی کھلاڑی بن گئے‘ میر اکبر خان نے تحریک انصاف میں شمولیت اختیار کرلی‘ پی ٹی آئی میراکبر کو حلقہ ایل اے 16باغ سے ٹکٹ جاری کرے گی دوسری جانب مسلم لیگ ن آزاد کشمیر کے راولپنڈی اسلام آباد کے صدر الحاج سردار محمد صدیق خان نے بھی تحریک انصاف میں شمولیت اختیار کرلی۔ جمعہ کو آزاد کشمیر کے وزیر جنگلات سردار میر اکبر خان نے چیف آرگنائزر پاکستان تحریک انصاف سینیٹر سیف اللہ خان نیازی سے اسلام آباد میں خصوصی ملاقات کی جس میں وزیر امور کشمیر و گلگت بلتستان علی امین گنڈا پور اور وزیراعلیٰ پنجاب کے معاون خصوصی سردار تنویر الیاس بھی موجود تھے ۔سردار میر اکبر خان کا وزیراعظم عمران خان کی قیادت اور پاکستان تحریک انصاف کے منشور پر مکمل اعتماد کا اظہار کیا ۔پاکستان تحریک انصاف نے سردار میر اکبر خان کو ایل اے-16 باغ سے امیدوار نامزد کرنے کا اعلان کر دیا ۔ مسلم لیگ ن آزاد کشمیر کے راولپنڈی اسلام آباد کے صدر الحاج سردار محمد صدیق خان نے بھی میر اکبر خان کے ساتھ تحریک انصاف میں شمولیت کا فیصلہ کیا ہے ۔