اسلام آباد(نیشنل ٹائمز) پاکستان پیپلزپارٹی کے چیئرمین بلاول بھٹو زرداری نے پی پی پی سندھ کی پارلیمانی پارٹی کے اجلاس میں ویڈیو لنک کے ذریعے شرکت کی۔چیئرمین بلاول بھٹو زرداری کو پی پی پی سندھ کی پارلیمانی پارٹی نے صوبے کے حالات پر بریفنگ دی۔ پی پی پی سندھ کی پارلیمانی پارٹی نے بریفنگ دی کہ این ایف سی اور ترقیاتی بجٹ میں سندھ کو اس کے جائز حصے سے محروم رکھا جارہا ہے۔ سندھ میں مردم شماری کم دکھائی گئی‘ جس کی وجہ سے وسائل بھی کم مل رہے ہیں۔ ٹی پی لنک کینال کھول کر جان بوجھ کر سندھ کی 60 سالہ تاریخ میں سب سے زیادہ پانی کی قلت پیدا کی گئی۔ارسا کی ناانصافی کو ہم سندھ پر معاشی حملہ تصور کرتے ہیں۔ سندھ کے حقِ روزگار پر ٹارگٹڈ اور ایک منظم حملہ کیا جارہا ہے۔سندھ کے وسائل پر ڈاکا مار کر اس پیسے کو اپنی سیاسی مہم کے لئے استعمال کرنے کی کوشش ہورہی ہے۔ سندھ کے معاشی قتل کی کوششوں اور سندھ پر معاشی حملوں کو کسی صورت قبول نہیں کریں گے۔ پی پی پی سندھ کی پارلیمانی پارٹی کے اجلاس میں شعبہ خواتین کی مرکزی صدر فریال تالپور نے بھی شرکت کی۔ پی پی پی سندھ کی پارلیمانی پارٹی کے اجلاس کی سربراہی وزیراعلی سندھ سید مراد علی شاہ نے کی۔ پی پی پی سندھ کی پارلیمانی پارٹی کے اجلاس میں سید قائم علی شاہ اور نثار کھوڑو سمیت پی پی پی کے تمام وزرا، اراکین اسمبلی، مشیر اور معاونین خصوصی نے شرکت کی۔