حیدرآباد(نیشنل ٹائمز)حیدرآباد چیمبر آف سمال ٹریڈرز اینڈ سمال انڈسٹری کے سینئر نائب صدر محمد الطاف میمن نے کہا ہے کہ کورونا کی موجودہ صورتحال میں وفاقی حکومت نے تاجر دوست اور عوام دوست بجٹ پیش کیا ہے۔ انہوں نے کہا کہ چھوٹی گاڑیوں پر سیلز ٹیکس 17 فیصد سے کم کرکے ساڑھے 12 فیصد کیا گیا ہے، ود ہولڈنگ ٹیکس ختم کیا گیا اور کافی چیزوں میں ریلیف دیا گیا ہے، یہ بجٹ عوام دوست اور تاجر دوست ہے۔ انہوں نے کہا کہ سرکاری ملازمین کی تنخواہوں اور پینشن میں 10 فیصد اضافے سے انھیں ریلیف ملے گا۔ انہوں نے کہا کہ غریب عوام کا سب سے بڑا مسئلہ مہنگائی ہے، اس کو کم کرنے کے لئے ٹھوس اقدامات کرنے ہونگے۔ دال، سبزی، گوشت، پیٹرول جیسی چیزوں کی قیمتوں کو مناسب کرکے ہی عام آدمی کو ریلیف دیا جاسکتا ہے۔