اسلام آباد (نیشنل ٹائمز)و زارت قانون و انصاف نے لاہور ہائی کورٹ کے دو ججوں سمیت تین ججوں کی سپریم کورٹ میں تعیناتی کا نوٹیفکیشن جاری کردیا۔وزارت قانون سے جاری اعلامیے کے مطابق صدر مملکت آصف علی زرداری نے آئین پاکستان کے آرٹیکل 177 کی شق (1) میں دیے گئے اختیارات کا استعمال کرتے ہوئے تین ججوں کی سپریم کورٹ میں تعیناتی کی منظوری دے دی ہے۔ان ججوں میں سندھ ہائی کورٹ کے جسٹس عقیل احمد عباسی، لاہور ہائی کورٹ کے جسٹس ملک شہزاد احمد خان اور لاہور ہائی کورٹ کے ہی جسٹس شاہد بلال حسن شامل ہیں۔اس کے علاوہ صدر مملکت نے لاہور ہائی کورٹ کے سینئر پیونی جج جسٹس شجاعت علی خان کو لاہور ہائی کورٹ کا قائم مقام چیف جسٹس مقرر کردیا ہے۔جوڈیشل کمیشن آف پاکستان کی جانب سے چیف جسٹس ہائی کورٹ کے تقرر تک شجاعت علی خان یہ ذمے داریاں انجام دیتے رہیں گے۔ججز کی تقرری کا اطلاق ان کی حلف کی تاریخ سے ہو گا۔
صدرمملکت نے ہائی کورٹ کے تین ججوں کی سپریم کورٹ میں تعیناتی کی منظوری دیدی، نوٹیفکیشن جاری
