اسلام آباد (نیشنل ٹائمز) سابق وزیرخزانہ مفتاح اسماعیل نے کہا ہے کہ سابق وزیر اعظم شاہد خاقان عباسی 6جولائی کو عوام پاکستان پارٹی کا اعلان کریں گے، نئی پارٹی کے قیام کا اعلان اسلام آباد میں کیا جائے گا ۔ نجی ٹی وی سے گفتگو کرتے ہوئے مفتاح اسماعیل نے کہا کہ اسلام آباد میں شاہد خاقان عباسی کی زیر صدارت ایگزیکٹوکمیٹی کا اجلاس ہوگا ،6جولائی کے بعد پارٹی سرگرمیاں شروع کرے گی ، ایک سال تک پارٹی کیلئے کام کیا جائے ،نواز شریف سے ناراضگی نہیں، شہباز شریف سے اختلافات نہیں،چودھری نثار اور زبیر عمر کو دعوت ہے ہماری پارٹی میں آجائیں ۔انہوںنے کہاکہ سندھ میں نواز لیگ کو چھوڑنے والے یا ناراض رہنما سے ہمارا کوئی رابطہ نہیں، ہمارے اشتہار کا پہلا لفظ سندھی زبان کا ہے ۔ مفتاح اسماعیل کامزید کہناتھا کہ ریٹائرڈ ججز یا جنرلز کو پارٹی میں نہیں لیا جارہا ہے،نواز شریف سے ذاتی نہیں سیاسی نظریاتی ناراضگی ہے ،مریم نواز سے ناراضگی نہیں وہ میری بہن ہیں۔انہو ں نے کہا کہ پارٹی کسی کے اشارے پر نہیں بنائی ،انتخابی نشان الیکشن کمیشن الاٹ کرے گا۔