نیو یارک(نیشنل ٹائمز)آئی سی سی مینز ٹی ٹوئنٹی ورلڈکپ کے 24ویں میچ میں آسٹریلیا نے نمیبیا کو 9وکٹوں سے شکست دیکر سپر 8مرحلے کیلئے کوالیفائی کرلیا۔سر ویوین رچرڈز اسٹیڈیم میں کھیلے گئے ورلڈکپ کے گروپ بی کے میچ میں آسٹریلوی کپتان مچل مارش نے ٹاس جیت کر نمیبیا کو پہلے بیٹنگ کی دعوت دی۔نمیبیا کے بیٹرز آسٹریلوی بولرز کے سامنے جم کر نہ کھیل سکے اور پوری ٹیم 17اوورز میں 72رنز پر آئوٹ ہوگئی۔آسٹریلیا کے خلاف نمیبیا کے 9بیٹرز ڈبل فیگرز میں بھی داخل نہ ہوسکے۔ کپتان ایراسمس 36رنز بناکر نمایاں رہے۔آسٹریلیا کی جانب سے ایڈم زمپا نے 4، جوش ہیزل ووڈ اور اسٹوئنس نے 2،2 جبکہ کمنز اور الیز نے ایک ایک وکٹ لی۔ نمیبیا کا 73رنز کا ہدف آسٹریلیا نے چھٹے اوور میں ایک وکٹ کے نقصان پر حاصل کرلیا۔آسٹریلیا کی جانب سے ٹریوس ہیڈ 17گیندوں پر 34اور مچل مارش 18رنز بناکر ناقابل شکست رہے، ڈیوڈ وارنر نے 20اسکور کیے۔ٹی ٹوئنٹی ورلڈکپ کے گروپ اسٹیج میں مسلسل تیسری کامیابی کے بعد آسٹریلیا نے 6پوائنٹس کے ساتھ سپر 8مرحلے کے لیے کوالیفائی کرلیا۔