لاہور(بنیشنل ٹائمز)سابق ٹیم ڈائریکٹر محمد حفیظ نے ٹی20 ورلڈکپ کے لیے قومی اسکواڈ میں عماد وسیم اور محمد عامر کی شمولیت کے حوالے سے دعوی کیا ہے کہ پی سی بی نے دونوں کھلاڑیوں کو ٹیم میں واپسی پر آمادہ کرتے ہوئے ان کے ساتھ معاہدہ کیا۔ایک نجی ٹی وی سے گفتگو کرتے ہوئے سابق کپتان کا کہنا تھا کہ ‘6 ماہ قبل جب ان دونوں کرکٹرز سے پی سی بی نے پوچھا کہ کیا وہ پاکستان کے لیے کھیلیں گے تو انھوں نے انکار کر دیا کیونکہ وہ ٹی20 لیگز میں شرکت کرنا چاہتے تھے’۔ “اب چونکہ جون کے مہینے میں کوئی لیگ نہیں ہے اس وجہ سے دونوں کھلاڑی ٹی20 ورلڈکپ میں حصہ لے رہے ہیں اور دونوں کھلاڑی ورلڈکپ کو بھی کوئی ٹی20 لیگ ہی سمجھ رہے ہیں۔ انہوں نے اس بات پر زور دیا کہ پی سی بی کو ڈومیسٹک پرفارمرز کو ترجیح دینی چاہیے جو لگن اور مہارت کا مظاہرہ کرتے ہوئے مسلسل پرفارم کررہے ہیں۔محمد حفیظ کا کہنا تھا کہ جب میں ٹیم ڈائریکٹر کے طور پر ڈومیسٹک کرکٹ کی نگرانی کر رہا تھا تو کامران غلام جیسے کھلاڑی کی حوصلہ شکنی کی گئی۔ کامران غلام نے اپنی صلاحیتوں کے باوجود لیگ کرکٹ کھیلنے کے لیے پاکستان چھوڑنے کا انتخاب کیا کیونکہ اسے لگتا تھا کہ ڈومیسٹک کرکٹ میں سنچریاں اسکور کرنا طویل عرصے میں فائدہ مند نہیں ہوگا اور وہ اپنی کارکردگی کی بنیاد پر کبھی بھی بین الاقوامی کیپ حاصل نہیں کرپائیں گے۔محمد حفیظ کا مزید کہنا تھا کہ محسن نقوی کی قیادت میں پی سی بی کا موجودہ طریقہ کار گھریلو ٹیلنٹ کی نشوونما کو نقصان پہنچاتا ہے۔ حفیظ نے کہا کہ پی سی بی کو اپنے منصوبے کا ازسر نو جائزہ لینے کی ضرورت ہے تاکہ اس بات کو یقینی بنایا جاسکے کہ پرعزم ڈومیسٹک کھلاڑیوں کو وہ مواقع ملیں جن کے وہ مستحق ہیں۔