راولپنڈی (نیشنل ٹائمز) میونسپل پنشنرز ایکشن کمیٹی نے پنشن پرمجوزہ ٹیکس کے نفاذ کو مسترد کرتے ہوئے مطالبہ کیا ہے کہ حکومت آئی ایم ایف کے مطالبے پر پنشن پر ٹیکس لگانے کی بجائے قومی مفادات کے فیصلے کرے ایکشن کمیٹی کے سرپرست اعلیٰ غلام محمد ناز، صدر طاہر محمود خان، سینئر نائب صدرحاجی نذیر احمد جنرل سیکریٹری غلام شبیر اور جوائنٹ سیکریٹری ملک مسعود احمد نے پنشن پر ٹیکس کی تجویز پر اپنے رد عمل میں کہا کہ ضروری نہیں کہ آئی ایم ایف کی شرائط قومی و ملکی مفاد میں ہوں اس لئے محض قرضہ لینے کے لئے انتظامی ڈھانچے کو تباہ نہ کیا جائے ایکشن کمیٹی نے مطالبہ کیا کہ سرکاری ملازمین اور ریٹائرڈ پنشنروں پر ٹیکس لگانے کی بجائے غیر ضروری ترقیاتی اخراجات اور اشرافیہ کی مراعات ختم کی جائیں انہوں نے کہا کہ ترقیاتی اخراجات اور منصوبوں کی آڑ میں سالانہ اربوں روپے کرپشن کی نذر ہو جاتے ہیں بلکہ اس کے ذریعے اراکین اسمبلی کو بھی بلیک میل کیا جاتا ہے انہوں نے کہا کہ چھوٹے سرکاری ملازمین ملک میں پہلے ہی سب سے زیادہ ٹیکس دے رہے ہیں اگر حکومت نے پنشن پر ٹیکس عائد کیا تو بھر پور مزاحمتی تحریک شروع کی جائے گی۔