کراچی(نیشنل ٹائمز)پاکستان پیپلزپارٹی کے مرکزی رہنما سید خورشید شاہ نے کہا کہ پی ٹی آئی سے اتحاد کی صورت میں مولانا فضل الرحمان کو بڑی قیمت چکانا پڑے گی، مولانا زیرک سیاست دان ہیں اور پی ٹی آئی سے اتحاد کی صورت میں ان کو اپنی سیاست اور ذات بچانا پڑے گی۔ میڈیا سے گفتگو کرتے ہوئے خورشید شاہ نے معاشی صورتحال کے بارے میں کہا کہ ملک کی معاشی حالت کو دیکھ کر بجٹ بنایا جانا چاہیے، ملک کی معیشت اس وقت بہتر نہیں ہے یہ بات سب کو پتہ ہے۔ خورشید شاہ نے مزید کہ پیپلزپارٹی کے 2008سے 2013کیپانچ سال ملک میں خوشحالی کی ضمانت تھے، ملک میں اس وقت 80 لاکھ ملازمین ہیں، سرکاری ملازمین کی تنخواہوں میں کم از کم 30 فیصد اضافہ ہونا چاہئے اس کے علاوہ صحت اور تعلیم کے فنڈز میں اضافہ ہونا چاہئے۔ خورشید شاہ نے وفاقی کابینہ میں شمولیت سے متعلق حکومت سے بات چیت کے بارے میں کہا کہ مجھے علم نہیں، تاہم یوسف رضاگیلانی چیئرمین سینیٹ ہیں ان کو شاید پتہ ہو، انہوں نے یہ بھی کہا کہ پندرہ سالوں میں پارلیمنٹ سے بھاگنے اور پارلیمنٹ کے فیصلوں کا احترام نہ ہونے کی وجہ سے مسائل ہیں۔