ابوظہبی(نیشنل ٹائمز)ابوظہبی چیمبر آف کامرس کے چیئرمین نے وزیراعظم شہباز شریف سے ملاقات کی ۔وزیراعظم محمد شہبازشریف سے ابوظہبی چیمبر آف کامرس اینڈ انڈسٹری کے وفد نے ابوظہبی میں ملاقات کی۔ وفد کی قیادت چیمبر آف کامرس کے چیئرمین عبداللہ محمد المزروعی کر رہے تھے۔ وفد سے بات چیت کے دوران وزیراعظم نے متحدہ عرب امارات کی اقتصادی ترقی میں چیمبر کے کردار کو سراہا۔ پاکستان اور متحدہ عرب امارات کے درمیان دوطرفہ تجارت اور سرمایہ کاری کے تعاون کا ذکر کرتے ہوئے وزیراعظم نے تجارت کے حجم اور دائرہ کار کو بڑھانے اور اس کے تنوع کے امکانات تلاش کرنے کے پاکستان کے عزم کا اعادہ کیا۔ انہوں نے متحدہ عرب امارات کے کاروباری رہنمائوں کو دعوت دی کہ وہ پاکستان میں سرمایہ کاری کے بے پناہ مواقع خصوصا توانائی، انفراسٹرکچر، سیاحت اور آئی ٹی کے شعبوں میں فائدہ اٹھائیں۔ ابوظہبی چیمبر آف کامرس کے اراکین نے پاکستان میں کاروبار اور سرمایہ کاری میں گہری دلچسپی ظاہر کی۔