لاہور (نیشنل ٹائمز )پنجاب اسمبلی کا اجلاس آج (پیر کو ) ہوگا، حکومت پنجاب نے ہتک عزت بل منظوری کے لئے ایجنڈے میں شامل کرلیا ہے ۔تفصیل کے مطابق پنجاب اسمبلی کے آج (پیر کو ) ہونے والے اجلاس کا ایجنڈا جاری کردیا گیا، سرکاری بزنس میں ہتک عزت بل 2024 منظور کروایا جائے گا، تمام صحافتی تنظیمیں ہتک عزت بل کو مسترد کرچکی ہیں، صحافتی تنظیموں نے آج پنجاب اسمبلی کی سیڑھیوں پر احتجاج کی کال بھی دے رکھی ہے۔پنجاب اسمبلی میں اپوزیشن بھی ہتک عزت بل کو مسترد کرکے اس کی مخالفت کا اعلان کرچکی ہے۔دوسری جانب وزیراطلاعات پنجاب عظمی بخاری نے آج صحافتی تنظیموں سے ملاقات کا اعلان بھی کیا ہے۔پنجاب اسمبلی کے دیگر بزنس میں لوکل گورنمنٹ سے متعلق سوالات کے جواب دریافت کئے جائیں گے۔ وزیراطلاعات پنجاب عظمی بخاری نے کہا کہ مریم نواز کی ہدایات کے مطابق ہتک عزت کا قانون تمام صحافیوں کی مشاورت سے لائیں گے، ہمارا ایجنڈا صرف فیک نیوز کا خاتمہ ہے۔ عظمی بخاری نے کہا کہ وزیراعلی پنجاب مریم نواز کی ہدایات پر تمام صحافتی تنظیموں کے نمائندوں کو پنجاب اسمبلی بلا لیا گیا ہے، تمام صحافتی تنظیموں کے نمائندوں سے دن12 بجے اسمبلی میں وزیر اطلاعات کے آفس میں ملاقات ہوگی۔عظمی بخاری نے کہا کہ تمام صحافتی تنظیموں کے نمائندوں سے ہتک عزت قانون سے متعلق اصلاح مشورہ ہوگا، ہم جھوٹی اور من گھڑت افواہوں کا خاتمہ چاہتے ہیں۔