اسلام آباد (نیشنل ٹائمز) پاکستان تحریک انصاف کے رہنما علی محمد خان نے کہا ہے کہ شہباز شریف کو اپنا استعفی دیکر نواز شریف کو وزیراعظم لانا چاہیے،نواز شریف سمجھتے ہیں کہ ان کے ساتھ زیادتی ہوئی تو سپریم کورٹ جوڈیشل کمیشن بنائے، مہنگائی کی وجہ سے عوام کے لیے جینا دوبھر ہوچکا ہے،ہرکوئی سیاسی پوائنٹ اسکورنگ کر رہا ہے قوم کے مسائل پر کسی کی توجہ نہیں۔ایک نجی ٹی وی سے گفتگو کرتے ہوئے علی محمد خان نے کہا کہ بانی پی ٹی آئی کے کیسز میں کچھ نہیں ان کو میرٹ پر ریلیف ملے گا،بانی پی ٹی آئی جیل سے بری ہوں گے ان کو ریلیف ملے گا۔ انہوں نے کہا کہ شہباز شریف کو اپنا استعفی لکھ کر نواز شریف کو وزیراعظم لانا چاہیے،نواز شریف قوم کے فیصلے کو مانیں اگر آپ بڑے لیڈر ہیں تو قوم نے آپ کو ریجیکٹ کیا ہے،قوم بانی پی ٹی آئی کے ساتھ ہے،نواز شریف کو سچ بولنا پڑے گا لیکن آدھا سچ نہیں پورا سچ بولنا پڑے گا۔ انہوں نے کہا نواز شریف اگر اپنے لئے انصاف چاہتے ہیں تو وہ سب کیلئے انصاف کا مطالبہ کریں، رجیم چینج کیا لندن پلان کا حصہ تھا اس کی بھی جوڈیشل انکوائری ہونی چاہیے۔علی محمد خان نے کہا ماضی میں جسٹس قیوم کی آڈیو کی بھی انوسٹی گیشن ہونی چاہیے، نواز شریف سمجھتے ہیں کہ ان کے ساتھ زیادتی ہوئی تو سپریم کورٹ جوڈیشل کمیشن بنائے۔