اسلام آباد(نیشنل ٹائمز)استحکام پاکستان پارٹی(آئی پی پی) کے رہنما عون چوہدری نے کہا ہے کہ کیا ان لوگوں کے خلاف کارروائی ہوگی جو اداروں کے خلاف بات کرتے ہیں، کون لوگ ہیں جو عدلیہ اور اداروں کو آپس میں لڑوانا چاہتے ہیں؟۔اسلام آباد میں پریس کانفرنس کرتے ہوئے عون چوہدری نے کہا کہ پاکستان کے حالات بہتری کی طرف جاتے ہی ہیں تو چند عناصر سازشیں شروع کر دیتے ہیں، آج کچھ سوالات عدلیہ اور عوام کے سامنے رکھنا چاہتا ہوں۔عون چوہدری نے کہا کہ پاکستان چلنے لگتا ہے تو ملک مخالف سازش کرنے والے عناصر پیدا کیے جاتے ہیں، کیا ان لوگوں سے بھی سوال کیا جائے گا جو روزانہ اداروں کی پگڑیاں اچھالتے ہیں؟رہنما آئی پی پی نے کہا کہ یہ ادارے ہماری شان ہیں ہماری عزت ہیں، معزز عدلیہ سے سوال ہے کون لوگ اداروں کو آپس میں لڑوانا چاہتے ہیں، لوئر جوڈیشری کو بھی سینئرز کی جانب سے کالز موصول ہوتی ہیں۔عون چوہدری نے یہ بھی کہا کہ سوشل میڈیا پر ایک بریگیڈ اداروں کے خلاف بیشنگ کرتی ہے، سوشل میڈیا ٹرولز کے خلاف بھی کارروائی ہونی چاہیے۔