اسلام آباد (نیشنل ٹائمز )وفاقی وزیر خزانہ اور ریونیو سینیٹر محمد اورنگزیب سے پاکستان بزنس کونسل (پی بی سی)کے وفد نے چیئرمین پی بی سی شبیر دیوان کی قیادت میں فنانس ڈویژن میں ملاقات کی جس میں فیڈرل بورڈ آف ریونیو (ایف بی آر)کے چیئرمین ملک امجد زبیر ٹوانہ بھی موجود تھے تاکہ تاجر برادری کے تحفظات پر تبادلہ خیال کیا جا سکے۔پاکستان بزنس کونسل (پی بی سی)کے وفد نے وزیر خزانہ سے ملک کے موجودہ معاشی منظرنامے پر تبادلہ خیال کیا اور بجٹ اور ٹیکس کی مخصوص تجاویز کو زیرغورلانے کے لئے پیش کیا۔وفاقی وزیر محمد اورنگزیب نے پی بی سی کی تجاویز کو تسلیم کیا اور ان کا شکریہ ادا کیااور چیئرمین ایف بی آر سے اس کا نوٹس لینے کو کہا۔ انہوں نے ایف بی آر کی ڈیجیٹلائزیشن کی جاری کوششوں پر تبادلہ خیال کیاجس کا مقصد ٹیکس کے دائرے میں نہ آنے والے طبقات کو لانا ہے۔ انہوں نے یقین دلایا کہ حکومت اور تاجر برادری دونوں کے لیے بہترین نتائج کو یقینی بنانے کے لئے تمام اقدامات باہمی مشاورت سے کئے جائیں گے۔