لاہور (نیشنل ٹائمز) وزیر خوراک بلال یاسین نے کامیاب مذاکرات کے بعد نان روٹی ایسوسی ایشن کو حکومتی نوٹیفیکیشن کے مطابق روٹی اور نان کی فروخت پر رضامند کر لیا ہے۔ وزیر خوراک بلال یاسین سے صدر متحدہ نان روٹی ایسوسی ایشن آفتاب گل نے وفد کے ہمراہ ملاقات کی۔ اس موقع پر سیکرٹری خوراک معظم اقبال سپرا، ڈائریکٹر فوڈ پنجاب شعیب خان جدون اور متحدہ نان روٹی ایسوسی ایشن کے عہدیداران بھی موجود تھے۔ وزیر خوراک سے کامیاب مذاکرات کے بعد نان روٹی ایسوسی ایشن نے 15 روپے کی روٹی فروخت کرنے کی یقین دہانی کروا دی۔وزیر خوراک بلال یاسین نے کہا کہ آٹے کی قیمت میں کمی کے ثمرات عوام تک پہنچانے کے مشن میں کامیابی ہوئی اور عوام کو ریلیف دینے کیلئے آٹے کی قیمت میں نمایاں کمی کی گئی ہے۔ نان روٹی ایسوسی ایشن پنجاب بھر کے تندوروں پر حکومتی نوٹیفیکیشن کے مطابق نان اور روٹی کی فروخت یقینی بنائیں۔ اس سے قبل ملکی تاریخ میں کبھی آٹے کی قیمت میں اتنی نمایاں کمی نہیں ہوئی۔ گزشتہ ایک ماہ میں 20 کلو آٹے کا تھیلا 1000 سے 1200 روپے جبکہ 10 کلو آٹے کا تھیلا 500 سے 600 روپے سستا ہوا۔ عوام کو سستی اور معیاری روٹی کی فراہمی حکومت کی اولین ترجیح ہے اور اس میں کوئی رکاوٹ برداشت نہیں کی جائے گی۔