مظفر آباد(نیشنل ٹائمز)آزاد جموں و کشمیر میں گاڑیوں کی رجسٹریشن کے لئے آن لائن سسٹم متعارف کرانے کا فیصلہ ،موٹر رجسٹریشن کا پرانا سسٹم ختم کرکے گاڑیوں کی رجسٹریشن جلد آن لائن کر دی جائے گی ، ٹوکن ٹیکس،رجسٹریشن اور ٹرانسفر کے لیے آن لائن سسٹم کے لئے وزیر اعظم کی ہدایت پر آزادکشمیرحکومت نے ٹینڈر جاری کردیا، آزادکشمیر میں محکمہ ان لینڈ ریونیو/ایکسائز کے پرانے طریقہ کار (مینویل)نظام کے تحت گاڑیوں کی رجسٹریشن ،ٹوکن ٹیکس کی ادائیگی اور ٹرانسفر پرانے نظام کے تحت ہورہی تھی جس میں شہریوں کو جہاں بے پناہ مسائل کا سامنا تھا وہیں آزادکشمیر میں گاڑیوں کا ریکارڈ کمپیوٹرائزڈ نہ تھا ۔ محکمہ ان لینڈ ریونیو /ایکسائزکے ذرائع کے مطابق آزاد جموں و کشمیر میں ایک لاکھ ننانوے ہزار گاڑیاں ، اور موٹر سائکلز رجسٹرڈ ہیں جس میں 50ہزار گاڑیاں رجسٹرڈ ہیں جن کے ٹوکن ٹیکس ،منتقلی اور نئی گاڑیوں کی رجسٹریشن اب آن لائن طریقہ کار سے ممکن ہوسکے گی جس سے شہری گھر بیٹھے استعفادہ حاصل کرسکیں گے ۔ٹینڈر پراسس مکمل ہونے کے بعد پہلے مرحلے میں آزادکشمیر کے تمام اضلاع میں گاڑیوں کے ریکارڈ کو کمپیوٹرائزڈ کرنے کے ساتھ ساتھ عملہ کو ٹریننگ بھی دی جائے گی۔