اسلام آباد (نیشنل ٹائمز)پاکستان تحریک انصاف (پی ٹی آئی) کے رہنما فواد چوہدری نے عمران خان کے اسٹیبلشمنٹ سے بات کرنے کے اعتراف کو اور واضح کرتے ہوئے کہا ہے کہ بدقسمتی سے پاکستان میں اسٹیبلشمنٹ کا سیاسی کردار ہے۔اپنے ایک انٹرویو میں پی ٹی آئی رہنما نے کہا کہ اگر اسٹیبلشمنٹ سے بات چل رہی ہے تو وہ اُن کی دلچسپی کے بغیر تونہیں ہوسکتی، چاہتے ہیں کہ بات چیت میں حکومت بھی شامل ہو تا کہ رولز آف گیم طے کیے جاسکیں۔انہوں نے کہا کہ فساد کے بغیر انتخابات کیلئے اسٹیبلشمنٹ سمیت تمام اداروں سے بات کرنا چاہتے ہیں۔انہوں نے کہا کہ بدقسمتی سے پاکستان میں اسٹیبلشمنٹ کا سیاسی کردار ہے، اسٹیبلشمنٹ کو ہی مذاکرات کرنے ہیں تو حکومت سائیڈ پر بیٹھ کر دہی کھارہی ہے؟ مریم نواز کی پریس کانفرنس کو بچکانہ قراردیتے ہوئے فواد چوہدری نےطنز کیا کہ مریم ہی پی ٹی آئی کا معاملہ ٹھیک کریں گی۔فواد چوہدری کا کہنا تھا کہ آرٹیکل 62 ون ایف سمیت آئین میں ترامیم کی ضروت ہے، تاحیات نااہلی کا قانون درست نہیں ہے، آئين میں عدلیہ سے متعلق اصلاحات ہونی چاہییں۔