اسلام آباد(نیشنل ٹائمز)پاکستان شوبز انڈسٹری سے وابستہ ممتاز گلوکارہ و اداکارہ حدیقہ کیانی اس وقت بلوچستان کے سیلاب زدگان کی مدد کے لیے اپنی مدد آپ کے تحت وسیلہ راہ کے نام سے کیمپین چلا رہی ہیں۔گزشتہ روز گلوکارہ نے سوشل میڈیا پلیٹ فارم انسٹاگرام پر اسٹوری شیئر کی جس کی ویڈیو وائرل ہوگئی۔وائرل ویڈیو میں حدیقہ کیانی سیلاب متاثرہ خواتین کی داد رسی کرتی دکھائی دے رہی ہیں۔انہوں نے متاثرہ خواتین کو اس مشکل گھڑی میں اللہ پر یقین اور ایمان کو مضبوط رکھنے کا درس دیتے ہوئے کہا کہ ’وہ چاہے گا طوفان آئے گا آندھی آئے گا آپ لوگ بچ جائیں گے، وہ چاہے گا آپ لوگوں کے لیے آسانی کرے گا‘۔متاثرہ خواتین اپنی مشکلات بیان کرتی ہیں تو حدیقہ مزید کہتی ہیں کہ ’کسی انسان کے سامنے نہیں جھکنا، صرف اللہ کے سامنے جھکنا ہے، وہی مدد کرے گا‘۔انہوں نے مزید کہا کہ ’میرا بھی وہی اللہ ہے اور آپ کا بھی وہ ہی اللہ ہے اور اس کی ذات پر یقین رکھنا ہے وہ آپ کو سب کچھ دے گا۔اس سے بے یقینی نہیں رکھنی وہی دے گا‘۔گلوکارہ متاثرین خواتین کو حوصلہ دے کر آگے بڑھنے کی کوشش کرتی ہیں تو متاثرہ خواتین اظہار تشکر کرتے ہوئے ان کے آگے ہاتھ جوڑ کر ان کے پیروں کو چھونے کی کوشش کرتی ہیں تو حدیقہ انہیں ’ میرے آگے نہیں۔۔۔‘ کہہ کر ان خواتین کے ہاتھوں کو بوسہ دیتی ہیں اور انہیں گلے لگا لیتی ہیں۔سوشل میڈیا صارفین کو ان کا سیلاب زدگان سے ہمدردی کا یہ انداز خوب بھا گیا، ان کی ویڈیو دیکھتے ہی دیکھتے وائرل ہوگئی۔ان کی ویڈیو کو اب تک دو لاکھ سے زائد صارفین نے دیکھا اور 18 ہزار سے زائد سوشل میڈیا صارفین نے لائک کیا ہے۔یاد رہے کہ اس سے قبل 2005 کے زلزلے اور 2010 کے سیلاب کے موقع پر بھی حدیقہ کیانی نے متاثرہ افراد کی مدد میں بڑھ چڑھ کر حصہ لیا تھا۔